O tradicional Desafío Volta a Lugo converterase no ano 2020 no Ancares Cycling Marathon, un evento dunha única xornada na montaña lucense que nace co obxectivo de ser o referente galego no mundo das probas Gran Fondo de alta montaña.
O Club Ciclista Cidade de Lugo seguirá organizando a proba, pero co apoio da empresa Eme Sports, encabezada por Ezequiel Mosquera e que conta coa experiencia do Gran Fondo Ézaro na Costa da Morte, onde reúne cada ano a máis de 1.500 ciclistas e que forma parte do Uci Gran Fondo World Series.
A Deputación de Lugo patrocina o evento, que transcorrerá polo Parque Natural dos Ancares e combinará a dureza das súas estradas coa beleza das súas paisaxes.
A proba partirá de Pedrafita do Cebreiro, terá final no Alto do Cebreiro e disputarase o 26 de xullo. "É unha proba que vén para quedar e para ser unha referencia no calendario", indicou Efrén Castro, responsable provincial de deportes, na presentación da carreira, na que considerou que constitúe un auténtico Eurodisney para os afeccionados ao ciclismo.