Os medios de emerxencias tiveron que desprazarse este sábado ata As Nogais tras empezar a arder o cableado da fachada dun inmoble.
O contratempo rexistrouse uns minutos despois das tres da tarde na rúa Rosalía de Castro, nun edificio situado fronte á casa consistorial, xerando alarma entre os veciños pola súa céntrica localización.
A central galega de emerxencias do 112 avisou do incidente ao GES de Becerreá e ao parque de bombeiros de Sarria. Finalmente, os propios veciños lograron sufocar cun extintor o lume, que provocou poucos danos. Os bombeiros do parque sarrián encargáronse, á súa chegada, de realizar medicións de temperatura e verificar que non había risco de que se reavivasen as chamas.
