A Consellería de Infraestruturas e Mobilidade encabezada pola súa titular Ethel Vázquez xunto a diversos representantes dos concellos de Ribadeo e Trabada, tamén cos seus máximos responsables, o ribadense Fernando Suárez Barcia e a trabadense Mayra García Bermúdez, achandaron este martes o camiño para tratar de atopar unha solución aos problemas que teñen coa traída de auga que abastece a gran parte de Ribadeo e a unha parte máis pequena do concello trabadense.
Dita traída está nunha situación moi deteriorada e ameaza con deixar sen abastecemento en calquera momento aos veciños e empresas que se abastecen dela nos dous municipios. Semanas atrás ambos os rexedores mantiveron unha agre polémica coa Xunta á mantenta desta obra pero tras o encontro deste martes os ánimos parecen terse arrefriado e todos apostan por buscar unha solución conxunta.
De entrada, a conselleira, que estivo acompañada do delegado da Xunta en Lugo, José Manuel Balseiro, apuntou que o conxunto da obra, que deberá consistir en construír un novo depósito de auga ademais das novas canalizacións, suporá un investimento duns 6 millóns de euros.
Precisamente por iso, e como xa fixera en ocasións anteriores, Ethel Vázquez apuntou que será necesario involucrar a outras administracións para conseguir unha cofinanciación da obra e aludiu especificamente á Deputación e á Confederación Hidrográfica do Cantábrico.
Na reunión estivo tamén o xerente de Augas de Galicia, Gonzalo Mosqueira, que do mesmo xeito que fixo a conselleira trasladou aos alcaldes a súa vontade de cooperar "cos municipios para que poidan garantir o abastecemento de auga á poboación, de acordo coas súas competencias. Con ese fin, Augas de Galicia procederá de forma inmediata a tramitar a revisión e proxecto de renovación integral das tubaxes da rede de abastecemento de Ribadeo".
Para realizar todo iso poderase utilizar como base un documento técnico anterior pero que foi redactado hai xa oito anos, en 2011, e a conselleira apuntou que antes de ser aprobado definitivamente terá que ser revisado e supervisado polos equipos técnicos do seu departamento.
A reunión deste martes desenvolveuse no medio dun talante cordial logo das cruces de acusacións anteriores e a impresión xeral ao seu termo foi boa.
