A Consellería de Medio Ambiente e Ordenación do Territorio volveu pedir unha reunión ao Goberno central para recibir instrucións por parte da demarcación de Costas en relación coa forma na que debe proceder para pechar ao público as grutas, arcos e corredores da Praia das Catedrais, no municipio de Ribadeo, despois de que transcorran "dez días" sen resposta desde a primeira solicitude.
Segundo informou a Consellería de Medio Ambiente, a Xunta de Galicia remitiu este xoves unha nova comunicación ao Ministerio para a Transición Ecolóxica coa finalidade de que as administracións con competencias en materia de seguridade no Monumento Natural, que son o Goberno central e o Concello de Ribadeo, "adopten as medidas precisas para garantir a seguridade das persoas" que visitan o areal.
Recorda, así mesmo, que "esta petición realízase tendo en conta que existe unha advertencia de perigo aínda non cuantificada, que foi recollida nun informe preliminar", un documento que recomenda "o peche cautelar das covas, grutas, arcos litorais, corredores e túneles" do Monumento Natural Praia das Catedrais.
Medio Ambiente precisa que o período de control e limitación de accesos ao monumento natural comeza, como cada ano, o 1 de xullo, e nesta ocasión contará con dez persoas. O límite diario de acceso será de 4.812 persoas.