A Fundación de Enxeñaría Civil de Galicia aconsellou este mércores pechar o acceso ás zonas con risco de desprendemento na Praia das Catedrais.
En consecuencia, a Consellería de Medio Ambiente e Ordenación do Territorio solicitou ao Ministerio de Medio Ambiente que peche ao público as covas, os arcos e os corredores en túnel das Catedrais para garantir a seguridade.
Tras un estudo xeolóxico e xeotécnico do monumento natural tras o accidente do pasado mes de marzo, a Fundación de Enxeñaría Civil asegura que existe un risco, aínda non cuantificado, de caídas e desprendementos de bloques ou pedras de diferentes tamaños.
A Xunta púxose en contacto co Ministerio xa que, segundo asegura a administración autonómica, a titularidade corresponde ao Estado, segundo a Lei de Costas. Así pois, solicita que se tomen as medidas oportunas.
As conclusións sobre o estado actual das Catedrais son preliminares aínda que, mentres non se dispoña do informe definitivo, o organismo autonómico considera que xa se deben adoptar medidas.