A Xunta leva retirada máis de media tonelada de patacas pola incidencia da praga da couza guatemalteca en 33 municipios galegos. Así figura nun informe presentado pola Consellería de Medio Rural ao Consello da Xunta este xoves, no que se apunta que se conceden axudas por 250.000 euros a un total de 2.000 expedientes.
Ademais, abordáronse as análises coñecidas hai unhas semanas nos que os técnicos da Comisión Europea constatan "unha redución rápida e sostida" da praga da pataca en Galicia, polo que prevé que será posible erradicala nun futuro próximo se se seguen de forma efectiva as normas de control.
A Xunta destaca que investiu preto de dous millóns de euros en medidas de control, mentres a maior parte do orzamento vai destinado a medidas de contención, retirada e destrución das patacas de zonas infestadas.
Así mesmo, o Goberno galego mantén a prohibición de plantar pataca en 33 concellos afectados pola praga, á vez que chama a evitar os movementos de tubérculos en zonas tampón.
