A Consellería de Medio Rural estudará levantar a prohibición de plantar pataca nos concellos que sufriron a praga da couza guatemalteca -que inclúen todos os da comarca, máis Abadín e A Pastoriza, na provincia de Lugo, ademais dos do norte da provincia da Coruña e Muxía- de cara ao próximo ano naqueles que cumpran dous anos sen terse rexistrado capturas de couzas. Desde a consellería aseguran que aínda non é posible establecer con exactitude en que concellos se levantaría a prohibición porque seguen facendo controis e haberá que facer as pertinentes valoracións para poder reactivar os cultivos con seguridade, aínda que sosteñen que se a evolución da praga "segue sendo positiva", como o está sendo na actualidade, "de face ao ano que vén poderanse levantar as restricións naqueles concellos que cumpran dous anos sen capturas".
Neste sentido, desde Medio Rural aseguran que a evolución da praga "é positiva na nosa comunidade e o obxectivo da completa erradicación considérase posible, por iso, cómpre seguir traballando na liña que se veu facendo de cara a procurar a erradicación". A este respecto, sinala que as actuacións desenvolvidas pola Xunta á hora de controlar esta praga "foron incluso postas de exemplo polo ministerio para o resto das comunidades e avaladas pola Unión Europea, tras unha auditoría realizada en setembro de 2018". "As autoridades europeas concluíron que só se pode acadar dita erradicación se se continúa coas actuacións desenvolvidas ata o de agora e así o faremos", subliñan.
De feito, a consellería mantén os controis establecidos no ano 2017 para lograr a erradicación da praga. Así, segundo os últimos datos cos que conta Medio Rural, no que vai de ano abríronse 83 expedientes por infraccións: 38 na provincia de Lugo e 45 na da Coruña.
MEDIDAS. O pasado mes de marzo cumpríronse dous anos desde que en 2017 se decretasen oficialmente as medidas concretas para frear o avance da praga da couza guatemalteca, que xa fora detectada en varios municipios da comarca en 2016.
En base á resolución da Xunta que desenvolvía o decreto estatal, prohibíase o cultivo de pataca na zona infestada durante un período mínimo de dous anos e ata que non se declarase oficialmente erradicada a praga. Ademais marcábase unha zona tampón nos terreos comprendidos dentro dunha franxa de cinco quilómetros ao redor dos municipios infestados. Neste territorio existe a obrigación de declarar as plantacións para que estas sexan vixiadas.
Co fin de frear o avance da praga, tamén se levantaron as plantacións existentes nese momento, prohibiuse a venda a granel do tubérculo e establecéronse férreos controis sobre o seu transporte.
