A Xunta critica o "silencio" do Goberno ante a crise de Alcoa

O conselleiro de Economía, Emprego e Industria, Francisco Conde, quéixase do "silencio" do Goberno central ante a petición de manter un encontro para abordar o despedimento colectivo anunciado en Alcoa San Cibrao, pois a Xunta púxose en contacto coas ministras de Industria e Transición Ecolóxica "sen obter resposta".

En cambio, critica que o Goberno "só está preocupado en reunirse coa Generalitat" para abordar o peche de Nissan, polo que afea o "tratamento asimétrico" cara a diferentes comunidades autónomas.

"Non entendemos esta discriminación que está a facer á Xunta de Galicia", lamenta nunha entrevista na Radio Galega recollida por Europa Press.

Así mesmo, insiste na demanda realizada polo presidente da Xunta, Alberto Núñez Feijóo, para empregar o novo fondo europeo en apoiar a Alcoa con axudas "específicas a proxectos de interese estratéxico na UE", destinadas a sectores "crave".

Do mesmo xeito que o Goberno anuncia un plan para a automoción como sector estratéxico, o Goberno galego demanda o mesmo para o aluminio, unido a un prezo eléctrico competitivo. Un respaldo que axudaría a diferentes empresas do sector en Galicia como Alcoa, Cortizo, Extrugasa e Exlabesa, citou.

Xunto a isto, insta o Executivo central a que "abandone" a "política de escusas" sobre Alcoa, mentres censura que "lamentablemente" a transición enerxética "está a desprazar á industria" no país.

PSA VIGO. Por outra banda, sobre a situación da planta de PSA en Vigo, mostra a súa "sensación agridoce", pois mentres a fábrica aposta "decididamente" pola "súa competitividade" e "innovación", "lamentablemente" o Goberno "non está a dar unha resposta ao que pide o sector".

Por iso, empraza a que se outorgue axudas como "incentivos" á demanda, "non só" para vehículos eléctricos, senón tamén para os de tecnoloxía "eficiente". Chama a seguir o modelo do Goberno francés e "non xerar dúbidas".