O delegado territorial da Xunta de Galicia en Lugo, José Manuel Balseiro, asegurou que a Consellería de Infraestruturas e Mobilidade está en disposición de licitar este mesmo mes as obras da nova depuradora de Viveiro, que custará catro millóns de euros, sempre que o Concello complete a documentación requirida pola administración autonómica, pendente desde maio.
Ante a mobilización social provocada polas verteduras detectadas na ría de Viveiro, Balseiro mostrouse disposto a concertar unha reunión na delegación da Consellería de Pesca, en Celeiro, para explicarlles aos responsables da plataforma veciñal como está a situación desa infraestrutura.
De feito, asegurou que o goberno galego ten o proxecto redactado e, ademais, recordou que xa "foi presentado", polo que só falta pór en marcha o proceso de licitación das obras, dado que a Xunta tamén ten reservados catro millóns de euros para a execución do mesmo.
"Se chega a documentación pendente, a Xunta de Galicia podería licitar esa obra no mes de setembro", dixo Balseiro.
Recordou, así mesmo, que tamén está pendente a construción do novo emisario submarino, pero neste caso ese proxecto ten que ser informado pola administración central.
Afirmou que á propia Xunta "úrxelle" adxudicar esas obras, cifradas en sete millóns de euros, porque serán amortizadas con fondos europeos e, de facelo fóra de praza, podería perder eses fondos.
