Xusto no día no que se cumpren tres anos da fatal riada que arrasou o barrio e segou a vida dunha das súas veciñas, a Asociación de Vecinos Valdeflores, do barrio de Xunqueira, en Viveiro, celebrou un acto para reclamar as melloras pendentes e recordar que esas actuacións son necesarias para evitar que algo así poida volver producirse.
Entre outros actos, a asociación colocou unha placa en recordo de Amparo Berdeal Camba, a muller que faleceu afogada a consecuencia da riada se produciu hai agora tres anos –o 18 de novembro de 2018–.
A placa foi colocada no cruzamento onde conflúen as tres rúas do barrio, xunto á ponte vella, para recordar a esta veciña, que o día da riada estaba na súa casa e, ao abrir a porta da vivenda, viuse sorprendida pola tromba.
Recordaban os veciños que a auga chegou ata
Este colectivo tamén organizou a concentración veciñal para "recordar que, tres anos despois, as cousas seguen igual", porque os proxectos "prometidos" polas distintas administracións para evitar que algo así poida repetirse e "as solucións de futuro" están "aínda nos caixóns e nos papeis".
"Quizais terán que pasar outros tres anos para porlle remedio ao asunto", lamentaba a asociación veciñal, quen tamén recordaba que a riada supuxo un auténtico "desastre económico".
"Son poucos os veciños de Xunqueira que non recordan á perfección aquel día no que tiveron que abandonar as súas vivendas, parte das súas pertenzas ou subirse ás partes altas das casas" para salvar, nalgún caso, a súa vida, precisaba este colectivo.
"Serán os seus recordos para o que quede de vida e o que lles contarán aos seus netos" as persoas maiores que, "de forma especial", habitan na "parte histórica" deste barrio vivariense, conclúe o colectivo veciñal nun comunicado.
