O Pescados Rubén Burela FS confirmou este xoves a continuidade de Julio Delgado á fronte do Burela feminino. "É un proxecto de continuidade. Vivimos unha tempada bastante boa, aínda que se nos escapou a liga por un par de goles, e tivemos o gran premio da Copa da Raíña en Burela. Por iso encaramos este novo ano con máis ilusión aínda", indicou o salmantino en declaracións que facilitou o club galego.
Ás ordes de Delgado, o equipo porase en marcha o vindeiro luns co inicio da pretempada e cunha liña continuista. "Era lóxico que o bloque se conservase pola gran tempada realizada. Ademais chegan Ale de Paz e Jenny Lores, que nos darán un plus máis, con experiencia en Primeira División", sinalou o técnico sobre as incorporacións.
Volverá contar con Peque, Dany, Ana Romero, Cilene, Bea Mateos, Luci, Jozi, Lara Balseiro, Jenny e Cris, ademais da moza Cristina Lourés, do Comarcal A Fervenza. "Imos traballar duro porque xa temos a Supercopa ás portas. Se finalizou ben a tempada 2018/19, co título de Copa da Raíña, tamén queremos comezar ben a 2019/20. Temos dous títulos en xogo no prazo de oito días e queremos ir a por todo", sostivo.
O Burela disputará a 4 Nations Futsal de Milán (31 de agosto e 1 de setembro) e a Supercopa (6 de setembro). "Aínda temos que compactar o equipo pero xa estamos a pensar nesas dúas citas. Creo que temos que seguir o mesmo camiño, o equipo fixo un gran traballo este ano e día a día as xogadoras traballaron na busca de recompensas. Agora o desafío é maior. Logo da Copa da Raíña e a Copa Galicia, esta tempada queremos máis", advertiu.
Tamén explicou que a tempada pasada supuxo "un punto de inflexión" para o equipo, que logrou "dar varios pasos adiante logo dun par de campañas de seca". O técnico, que leva catro tempadas no equipo, estivo arroupado polo presidente do club, Manuel Blanco, e a vicepresidenta, Cesarina Fanego.
