O Xulgado do Contencioso-Administrativo número 1 de Lugou ratificou este mércores as medidas de prevención adoptadas pola Xunta na Mariña e que cualificou de absolutamente "imprescindibles" para facer fronte ao brote por Covid-19 detectado nesta zona de Lugo.
As medidas afectan os municipios de Alfoz, Barreiros, Burela, Cervo, Foz, Lourenzá, Mondoñedo, Ourol, Ribadeo, Trabada, O Valadouro, O Vicedo, Viveiro e Xove, informan fontes do TSXG.
No entanto, os casos activos na Mariña baixaron este mércores a 151 -doce menos que o martes- e a partir deste xoves levantaranse as restricións de movemento en toda a comarca fóra de en Burela, onde se concentra o 77% dos positivos, un total de 116, nove menos que o día anterior.
O auto do xulgado lucense indica que as decisións adoptadas pola Xunta o pasado 10 de xullo son "adecuadas á situación existente na Mariña lucense e, en concreto, á evolución dos casos que se foron detectando ao longo dos últimos días".
Ademais, destaca que, atendendo á situación concreta de cada municipio da comarca, a autoridade sanitaria procedeu "a discriminar as diferentes zonas, adoptando medidas restritivas unicamente naqueles lugares onde a taxa de incidencia do brote evolucionou de forma importante, flexibilizando tales medidas noutras zonas onde ou ben non se detectaron casos ou foron escasos ou puntuais".
"Non cabe dúbida de que a ratificación xudicial que agora se interesa persegue un fin constitucionalmente lexítimo e a súa adopción atópase amparada por unha norma de rango legal", recalca o xuíz.
Así mesmo, incide en que existe "proporcionalidade" nas medidas adoptadas e que, limitadas no tempo, son "idóneas, absolutamente imprescindibles e necesarias aos fins que perseguen, sen implicar un sacrificio desmedido por parte da poboación afectada ante a gravidade da situación".
Por todo iso, considera que se axustan aos parámetros fixados polo Tribunal Constitucional cando se trata de intervencións dos poderes públicos que inciden na liberdade da cidadanía.
