Ángel Manuel Hernández, o policía nacional de San Cibrao que resultou ferido nos disturbios rexistrados en 2019 en Barcelona, foi retirado oficialmente esta semana do corpo por decisión dos seus superiores. Unha xubilación forzosa aos 45 anos que vén motivada polas secuelas que lle deixou no brazo aquel enfrontamento da noite do 8 de outubro de 2019.
Desde entón, este axente mariñán viviu un auténtico calvario médico, xa que a fractura aberta no brazo que lle causou un lastro complicouse e, logo de dúas operacións, deixoulle secuelas que segundo os baremos da Policía impídenlle seguir prestando servizo. É unha decisión controvertida froito dun regulamento interno tamén polémico, xa que son moitos os compañeiros que entenden que o corpo policial tería que ter ocos dabondo para estes axentes sen necesidade de xubilalos forzosamente.
De feito, cando o mércores pola tarde Ángel Manuel Hernández acudiu ao cuartel coruñés de Lonzas para depositar a súa arma regulamentaria, a súa placa e oficializar o seu adeus definitivo á actividade policial, atopouse cunha improvisada homenaxe dos seus compañeiros, que lle fixeron o corredor e despedírono entre aplausos e mensaxes de ánimo. Tantos que o mariñán non puido reprimir as bágoas. Ao final, entregáronlle tamén unha bandeira de España asinada.
Unha onda solidaria que se reproduciu tamén nas redes sociais, onde se combinaron as mostras de agarimo e apoio coas queixas polo "inxusto" da decisión da Policía de xubilalo.
"O principal problema é que perdín moitísima forza na man, teño mobilidade reducida na boneca e sufro tensión postraumática", relatou o protagonista a El Independiente. Policía nacional da Unidade de Intervención Policial (UIP) desde 2010, Ángel Manuel Hernández puxo así punto e final a unha carreira que se complicou aquela noite nunha rúa próxima á famosa praza de Urquinaona, en Barcelona.
Á súa volta a Galicia foi recibido como un heroe e non faltaron os recoñecementos e homenaxes por parte do Goberno e o corpo. Pero segundo denuncian desde a súa contorna, duraron pouco porque pronto se foron esquecendo del, ata que ao final decidiron xubilalo aos 45 anos.
