O programa Xuventude do Concello de Xove permite aos mozos do municipio gozar de disciplinas deportivas e de lecer alternativo durante a tempada estival. A segunda cita co paintball está prevista para o próximo día 8 na localidade de Galdo, do concello de Viveiro.
A primeira quenda reuniu a mozas de entre 14 e 30 anos de idade e está destinada aos que teñen entre 10 e 13 anos. Un grupo de 33 nenos do municipio xovense participará nesta iniciativa durante a tarde.
Todos os mozos terán a oportunidade de desestresarse co xogo durante unha xornada que arrincará ás catro da tarde. A organización estima unha duración aproximada de tres horas.
O Concello xovense ten así mesmo en marcha unha nova edición do Xove 360º, que aglutina ao colectivo de fotógrafos locais que desde hai once anos realizan actividades relacionadas con este campo. As imaxes formarán parte dunha exposición, que integrarán 47 instantáneas, 34 serán de temática libre e outra especial dedicada ás fervenzas, na que se presentan 13 traballos.
As festas patronais da parroquia de Sumoas en honra a San Antonio arrincan o venres cunha churrascada
A mostra, na que participan doce fotógrafos, estará aberta na sala do centro cívico de modo ininterrompido desde o próximo día 11 ata o 2 de setembro, en horario de seis da tarde a dez da noite.
Doutra banda, as actividades festivas proseguen no municipio coas patronais de Sumoas, que honran a San Antonio.
As festas son todo este fin de semana. O programa comeza o venres cunha gran churrascada e verbena animada polo grupo Fénix. As actividades continuarán este sábado con misa solemne á unha da tarde, seguida de procesión e sesión vermú. Orquestra Fin de Siglo encargarase de animar a velada e compartirá a verbena co Trío Savoy.
O programa será case idéntico este domingo, no que haberá misa á unha da tarde, seguida de procesión e sesión vermú animada polo trío Merengue.
