"O problema do furtivismo é unha secuela constante na zona e desde as organizacións pesqueiras e a administración autonómica lóitase a diario para tratar de estabilizar e erradicar a situación na medida do posible", din desde a confraría de Celeiro, que recibe axuda da Consellería do Mar para a contratación de dous vixiantes e que recentemente tamén adquiriu con cargo ao Galp un vehículo todoterreo para este labor.
O depósito acolleu unha xornada informativa sobre o proxecto colectivo de cogestión no ámbito das confrarías de Celeiro e O Vicedo que permite as contratacións dos dous vixiantes e dunha bióloga para as anualidades de 2020 e 2021, cunha axuda de 52.416 euros procedente da FEMP e da Consellería do Mar.
Segundo explicou o patrón maior, Domingo Rey, o obxectivo deste proxecto é "fomentar a xestión sostible e integral dos recursos mariños e hábitats costeiros e o ámbito territorial das confrarías de Celeiro e O Vicedo", para o que contratan guardapescas marítimos para vixilancia e control e unha bióloga para asistencia técnica e asesoramento.
Os servizos de vixilancia, expuxo, son "básicos para salvagardar o medio mariño e contribuír á sensibilización ambiental". Os vixiantes, que usan dispositivos de geolocalización, colaboran co Servizo de Gardacostas, realizan controis e axudan aos mariscadores no transporte de material de cultivo a zonas de simiente, entre outras funcións.
A bióloga elabora e segue os plans de cogestión dos recursos mariños vivos, realiza controis mensuais das capturas realizadas polos mariscadores, asume traballos técnicos -cartografía de hábitats e especies, mostras de campo ou observación de especies conspicuas e exóticas invasoras que poidan afectar os bancos marisqueiros- e elabora estatísticas.
"O labor de asistencia técnica é vital polos seus controis mensuais e pola avaliación constante dos recursos e a biodiversidade", destacan desde a confraría. Tamén envía semanalmente a Intecmar mostras biolóxicas para analizar o estado das augas e especies marisqueiras, ademais de formar aos mariscadores en novas "competencias vinculadas a unha mellor xestión e conservación dos recursos mariños vivos e os seus ecosistemas".
