Vinte e catro surfeiros de prestixio “internacional” inscribíronse para participar no Illa Pancha Challenge, para tratar de cabalgar O Panchorro, unha onda duns 20 metros de alto que se produce fronte á Illa Pancha, no municipio lucense de Ribadeo.
O presidente da Deputación, Darío Campos, e o alcalde de Ribadeo, Fernando Suárez Barcia; e os organizadores do evento, Óscar García e Eric Ribiere, presentaron este xoves no Parador de Turismo da localidade lucense este evento, que se desenvolverá cando as condicións do mar o permitan, antes da primavera.
Entre os participantes destacan nomes como Grant Twig Baker, campión do mundo sobre ondas xigantes, ou Andrew Cottom, actual “líder” dese campionato.
Campos precisou que “ese evento vai contar cunha gran repercusión internacional”, dado que espera reunir na Mariña a unhas 7.000 persoas, ademais de conseguir “máis de 150.000 visitas na web que retransmitirá en directo a proba deportiva”.
“Na Mariña temos as características perfectas para celebrar este tipo de eventos, máis de 100 quilómetros de costa e case 20 puntos destacados para a práctica do surf, o que fai da costa lucense un destino de excepción para deportistas e amantes das ondas de todo o mundo”.
As ondas mínimas para que o campionato leve a cabo son de 7 metros, aínda que se espera que O Panchorro oscile entre 15 e 20 metros.
