Os novos empadroados, que elixen vivir na localidade e os nacementos volveron a levar o padrón de Ribadeo por enriba dos dez mil habitantes. Tras a revisión efectuada hai uns meses, eliminando duplicados, caera por baixo desa cifra pero agora alcanza as 10.017 almas. Segundo o alcalde, Fernando Suárez, "o 70% da poboación reside na localidade e o 30% nas parroquias pero o Concello seguirá a apostar polo rural para tentar minimizar a desertización".
O rexedor explicou que "desta nova foto fixa da poboación total de Ribadeo despréndense varias reflexións. Unha moi importante, que a pesar de que hai uns meses fixéramos unha limpeza do padrón para eliminar todos duplicar e iso levounos a baixar dos 10.000 habitantes, chegou a 9.930 por aí, agora volveu subir o padrón porque nace xente e sobre todo porque vén xente doutros concellos que se empadroa aquí porque ve que Ribadeo segue medrando e ten posibilidades, cada día máis".
Fernando Suárez engadiu que "tamén isto indica que aínda que é importante desde o punto de vista da participación nos tributos do Estado, realmente é moi pouquiña cousa porque a liña onde o Estado lle ten que dar máis aos concellos é cando se exceden os 20.000 habitantes, na parte de arriba, ou os 5.000 habitantes na parte de abaixo. Polo tanto Ribadeo que estea un pouquiño por enriba dos 10.000 ou un pouquiño por debaixo dos 10.000 economicamente pouco lle supón. É máis unha liña desde o punto de vista da moral, de que seguimos medrando e que isto, cos seus problemas e coas necesidades que poidamos ter, vai a máis, imos a máis".
O alcalde engadiu ademais que "por outra banda, ver un pouco como se distribúe a poboación, vemos que a vila cada día ten máis peso específico, agora mesmo é o 70% e as parroquias un 30%. É unha dinámica e unha tónica que lle pasa a Ribadeo, e entendo que lle pasa a todo o mundo civilizado, que a poboación tende a agruparse máis nos ámbitos urbanos e cada vez o proceso de desertización das parroquias é maior. Máis atenuado en Ribadeo que noutros concellos próximos a nós e de menor entidade, pero é unha realidade. Isto indícanos que debemos seguir apostando polo rural e traballando para conseguir que, se cadra, non se logre compensar pero se polo menos retardar este ritmo de desaparición e de transvasamento do campo á vila".
PLENO E MESAS ELECTORAIS. Por outra banda, para este martes ás oito da tarde está convocado un pleno extraordinario no que, como único punto da orde do día, o alcalde fixou o "sorteo público para elección dos membros titulares e suplentes para a formación das mesas electorais para as eleccións xerais ao Congreso e Senado do 10 de novembro de 2019".
