Unha veciña de Faro, no municipio de Viveiro, localizou este venres pola mañá os kaiaks cuxa desaparición denunciaron uns turistas, procedentes de Madrid, na comisaría vivariense o pasado 30 de agosto. As embarcacións atopábanse nun campo próximo á estrada que conduce a monte Faro, polo que se cre que puideron deixalos alí á mantenta para que fosen descubertos.
Ademais, pénsase que puideron abandonalos nese punto de madrugada, dado que na noite do xoves non estaban nese lugar, situado antes de chegar á antiga igrexa da parroquia.
A veciña xa avisou á Policía Nacional de que os atopou e todo apunta a que poderían ser os que faltaron, segundo comprobaron os axentes. Está previsto proceder á súa recuperación con axuda de Protección Civil.
A veciña que os atopou, Adriana Rodal, viu os kaiaks ao pasar no coche sobre o campo próximos ao muro dunha cabana existente na zona. Ao parecer, outro residente viunos ás oito menos vinte da mañá ao pasar para ir ao traballo, pero non lle deu importancia nin se detivo.
Os propietarios deixáranos amarrados cunhas cadeas a unha argolla existente nas rocas da zona de Punta Arnela, nun extremo da praia de Area, o 28 de agosto, e atados entre eles.
