VIVEIRO. A redución da poboación de gaivotas en Viveiro «é totalmente viable e legal» segundo puideron confirmar os residentes do casco que impulsan a creación dunha nova asociación veciñal, que consultaron o asunto cunha empresa especializada e coa Xunta e incluso apuntan un orzamento que rolda os 10.000 euros anuais para levar a cabo esta medida, que esperan que asuma algunha administración.
A reunión, aberta a todos os interesados, é ás oito da tarde deste mércores na sala multiusos do concello, onde quedará constituída a asociación co voto dos estatutos e a elección de xunta directiva entre os asistentes. O colectivo expón varias demandas para mellorar a zona histórica de Viveiro e unha das principais é a «praga» de gaivotas, «polo ruído e a suciedade» que levan.
Segundo explican, falaron do tema coa empresa responsable do informe que realizaron biólogos hai uns anos para o Concello —cando se retiraron ovos e niños— e consultárono este mesmo martes con Medio Ambiente. «Se se fai cun informe dunha empresa especializada que diga onde están localizados vos nenos e unha data na que se vaia facer a retirada, é totalmente viable e legal. Confirmado pola Xunta», aseveran.
Tamén pediron orzamento a unha empresa de traballos en vertical, con dous operarios e «cunha plataforma para non ter que pisar os tellados», e estiman o custo nuns 10.000 euros anuais. «Para reducir a poboación de gaivotas parécenos bastante alcanzable, porque é moi molesto, non só para o casco, senón tamén para Covas ou Celeiro», din.
