A Policía Local de Foz denunciará ao propietario dun valo publicitario que tiveron que retirar na mañá deste xoves os bombeiros de Barreiros na Avenida de Asturias, porque presentaba serio risco de caer á calzada e provocar incidencias. A denuncia, por incumprimento da ordenanza en materia de seguridade, cursarase contra o propietario do valo e o dono da leira na que está asentada, pois a obrigación é compartida á hora de que se cumpra a normativa.
O cartel, situado a uns catro metros de altura, obrigou a intervención dos bombeiros, que tiveron que usar a escaleira e unha rebarbadora para cortar a chapa de metal, que xa presentaba bastante óxido e estaba vencida.
Os potentes refachos de vento que sopraron na mañá deste xoves motivaron a actuación preventiva, na que os bombeiros empregaron preto de vinte minutos; parte deste tempo o viario estivo cortado por completo, polo que se provocaron algunhas retencións, xa que a estrada de acceso a Foz desde Ribadeo, aínda que despois a Policía Municipal habilitou un carril para dar o paso alternativo a condutores nun ou outro sentido.
