Todos os integrantes da Mancomunidade de Concellos da Mariña aprobaron este venres unha declaración institucional na que mostran o seu compromiso coa factoría de Alcoa e co emprego e mostran a súa solidariedade cos traballadores "nestes momentos tan difíciles". Ao termo do encontro, que levou a cabo de xeito telemática, o presidente do ente e alcalde de Foz, Fran Cajoto, mostrouse satisfeito coa actitude de todos os integrantes: "Ante un problema común, non hai cores políticas", dixo para reflectir a unión de todos os concellos mariñáns nesta cuestión.
No documento da Mancomunidade recóllense todas as medidas que ata o momento fóronse expondo como solucións para darlle viabilidade á planta. Así, solicítase ao Goberno central que aprobe con carácter "urxente" unha tarifa eléctrica que recolla as alegacións presentadas ao estatuto electrointensivo e á Xunta, no marco das súas competencias en industria, que incentive a renovación e a mellora da planta e dos procesos industriais tanto en materia ambiental como en novas tecnoloxías con entes como o Igape.
Ademais de esixir a Alcoa que abandone o seu plan de desmantelar Aluminio, solicitan que se convoque a mesa multilateral para avanzar nunha solución. E se todas estas medidas non fosen suficientes solicitan ao Goberno que "estude a intervención da empresa".
Outra das peticións que reflicte o escrito é que se retome por parte do Goberno central "a necesidade de autorización administrativa previa para tramitar os Eres, de forma que se fixe o obxectivo na garantía do emprego".
Os representantes políticos comarcais recordaron o impacto económico de Alcoa na economía comarcal ao que cualificaron de "excepcional" e subliñaron que a factoría necesita un plan de viabilidade a longo prazo cun maro estable e que a multinacional cumpra os seus compromisos.
Tamén insistiron en que "calquera solución debe partir da premisa inescusable da garantía de emprego a longo prazo".
