Unha vaca que irrompeu no viario que vai de Ferreira do Valadouro a Cangas de Foz ocasionou un accidente no que os efectivos do Ges de Cervo e os bombeiros de Barreiros tiveron que axudar a saír do vehículo ao matrimonio ocupante. A muller, de 65 anos, consta como ferida e foi trasladada ao hospital.
O accidente produciuse cara ás 19.20 horas deste domingo no punto quilométrico 4,800 da estrada LU-162, á altura de Moucide, no termo municipal do Valadouro. O coche circulaba en strong <>dirección Cangas, de onde son veciños os implicados, e non puido evitar o impacto co animal.
Ao lugar tamén acudiu unha patrulla do Subsector de Tráfico da Garda Civil, así como unha ambulancia do 061 que trasladou á muller ao Hospital Público da Mariña. O home, de 73 anos, non sufriría feridas de consideración.
Segundo explican non foi necesario excarcerar pero retiraron unha parte do asento da muller para facilitar a manobra de extracción, xa que estaba convalecente dunha intervención cirúrxica.
