O Parlamento galego ha reclamado, por unanimidade, ao Goberno central a intervención pública de Alcoa en San Cibrao, no municipio de Cervo, inicialmente de forma transitoria a través da Sociedade Estatal de Patentes Industriais (Sepi), para asegurar o emprego e facilitar a súa venda a un investidor privado que garanta un proxecto viable.
Forma parte dunha batería de medidas urxentes, que promove o PPdeG nunha proposición non de lei —apoiada por Bloque e PSdeG—, en favor da industria electrointensiva galega para garantir a súa viabilidade. "Non entendemos por que non se adopta a decisión xa de intervención temporal da Sepi", afirmou a deputada popular Elena Candia
Esta proposta tamén busca incrementar o orzamento destinado a subvencións relativas ao mecanismo de compensación de custos de emisións indirectas de gases de efecto invernadoiro á contía máxima permitida pola UE (25% dos ingresos obtidos en poxas de CO2), "polo que esta partida podería chegar aos 450 millóns de euros".
Ademais, requírese activar o Fondo Español de Reserva para Garantías de Entidades Electrointensivas para a cobertura dos riscos derivados de operacións de compravenda a medio e longo prazo de subministración de enerxía eléctrica (PPA) entre consumidores de enerxía que teñan a condición de electrointesivos.
Igualmente, úrxese a convocar poxas de electricidade de orixe renovable, así como establecer mecanismos de xestión da demanda que permitan ofrecer flexibilidade ao sistema eléctrico.
APOIO DA OPOSICIÓN. Pola súa banda, Ramón Fernández Alfonzo (BNG) pide ao Goberno central medidas con urxencia debido a que o risco no que están as electrointensivas "é grave e inminente", pero tamén empraza á Xunta a que cumpra coas súas competencias e poña en marcha unha empresa publica de enerxía e unha tarifa pública galega.
Noelia Otero (PSdeG) defendeu que o Goberno central xa puxo "en marcha" varios mecanismos que reclaman os populares, polo que acusa ao PPdeG de buscar "confrontación política".
No tocante a Alcoa, Otero deixa claro que: "Se non hai outra vía para manter os postos de traballo, votaremos a favor dunha intervención temporal por parte da Sepi". Iso si, destaca a "mala fe" da empresa, que queda referendada polo Tribunal Supremo.
O PSOE PIDE UN PACTO INDUSTRIAL. Pola súa banda, o PSdeG pediu á Xunta un pacto pola industria estable e con compromiso orzamentario co obxectivo de reactivar a economía e modernizar o modelo produtivo cara á transición ecolóxica. Unha medida que os populares denegaron, polo que non saíu adiante a pesar de contar co respaldo do Bloque.
Na súa intervención, Martín Seco (PSdeG) fixo un balance "claramente negativo" en materia industrial da Xunta. Referiuse ao peche anunciado por Vestas en Viveiro sen que a Xunta poña en marcha "mecanismos necesarios para manter a produción".
Considera que o modelo industrial da Xunta "non funciona", "renunciando a exercer a súa competencia industriais". Arremete contra unha xestión "moi deficiente" e unha baixa execución "real do gasto" do Instituto Galego de Promoción Económica (Igape).
En resposta, Miguel Tellado (PP) responsabilizou á política enerxética "errática" e "irresponsable" do Goberno da destrución do tecido empresarial.
