A ribadense Nerea Lago, unha das grandes figuras do Club de Remo Ribadeo, volveu deixar mostras da súa calidade e proxección no mundo do remo ao proclamarse subcampioa de España xuvenil en skiff feminino na competición disputada na localidade vasca de Legutiano, onde se deron cita todos os grandes do remo nacional.
Nerea Lago, que é unha habitual das concentracións da selección española, clasificouse con solvencia para disputar a final A da proba, sobre 2.000 metros, entrando na segunda praza, a menos de dous segundos da campioa, Marta Mariano, do club de La Rápita. A proba foi tremendamente igualada, concluíndo na terceira posición outra galega, Raquel Rodríguez, do club de Cedeira, tamén a moi pouca diferenza de Nerea.
A deportista do Club de Remo Ribadeo amplía o seu brillante palmarés
En xuvenís tamén participou para o club de Ribadeo Íker García, que quedou moi preto de entrar na final A de skiff, pero tivo que conformarse con disputar a B, na que se impuxo.
Máis preto das medallas quedou Valeria Álvarez, que foi cuarta sobre 1.500 metros no skiff individual cadete feminino.
CASTROPOL. O Club de Mar de Castropol conquistou dúas medallas na cita grazas á grande actuación dos seus xuvenís. Pelayo Álvarez e Carlos Álvarez ocuparon a terceira praza no 2X, mentres que Izan Iglesias e Iago García aínda quedaron máis cerca do ouro, colgándose a medalla de prata no 2-. Iglesias e García terminaron a só dous segundos dos gañadores, mentres que Pelayo e Carlos terminaron tamén a 2 segundos da medalla de prata.
Outro remeiro de Castropol que estivo preto das medallas foi Víctor Sierra, que ocupou a quinta posición na final A de a proba de skiff masculino sub-23.
A parella formada por Juan Antonio Martínez e Mateo Pérez foi segunda no dobre scull masculino cadete.
