A chegada de turistas á comarca foi unha constante nos meses de xullo e agosto. Aínda que os municipios máis turísticos seguen liderando o número de visitantes cada vez son máis os viaxeiros que se deciden a coñecer distintos puntos da comarca e este verán houbo turistas en cada recuncho da Mariña. Así o reflicten os datos, como os que ofreceron este xoves Ribadeo e Burela.
As oficinas de turismo de Ribadeo recibiron preto de 75.000 visitas en xullo e agosto. Só en agosto, a oficina da vila recibiu 14.000 viaxeiros e a da praia das Catedrais, 19.000. Ademais, o concelleiro de turismo, Pablo Vizoso, asegurou que "segue a alza a tendencia de persoas que pasan a noite na vila", cunha ocupación entre o 95 e o 100%.
Madrid segue sendo o principal destino emisor, seguido de Cataluña, Andalucía, Valencia e País Vasco. Vizoso tamén destacou que, malia o descenso do turismo internacional, rexistrouse un aumento dos viaxeiros de Portugal e Italia, "que duplica practicamente o rexistrado en anos anteriores e que iguala a Francia, que segue a ser o principal emisor". Ademais, Ribadeo recibiu 24 grupos organizados.
No caso do Camiño Norte, a oficina de información ao peregrino recibiu preto de 2.000 viaxeiros e o punto de información do santuario de Nosa Señora das Virtudes, 260.
Pola súa banda o concelleiro de turismo de Burela, Ramiro Fernández Rey, destacou as preto de 4.000 consultas rexistradas na oficina de turismo e unha ocupación hostaleira próxima ao 100%. "Estas cifras son positivas e están a recuperar a tendencia de antes da pandemia", dixo. "Calquera que viñese a Burela podía ver moitísima xente polas rúas e nas praias", sinalou. Neste caso, Madrid, Castilla y Léon e País Vasco son os principais emisores de viaxeiros.
Fernández Rey tamén destacou o éxito das visitas guiadas ao barco museo Reina do Carmen, a pesar de aforamento limitado a dez persoas. "O mes de xullo foi espectacular e case dobrou a afluencia do ano 2019 que fora bo", indicou. Tamén foron un éxito as rutas xeolóxicas, pero o edil recoñeceu que as visitas a Vila do Medio non alcanzaron as cifras esperadas.
Viveiro contará cun expositor individual no que ofrecerá información do municipio e proxectaranse vídeos. A concelleira de turismo, Marisol Rey, o tenente de alcalde, Jesús Fernández e persoal da oficina de turismo están este venres en Silleda. Rey manterá encontros con turoperadores internacionais e tamén está prevista unha degustación con 300 racións de empanada de pescada e 120 racións de pan dos apóstolos.
Burela tamén volveu elixir este salón para a súa promoción turística. No seu caso organizaron unha degustación de bonito que será o domingo contando coa colaboración da asociación cultural Ledicia.
