A Conferencia Sectorial de Turismo acordou o mércores coas comunidades autónomas e as entidades locais os 23 proxectos que financiará o programa ordinario dos plans de sustentabilidade turística en destinos, que conta cun investimento total de 64 millóns de euros. Un dos plans elixidos foi o presentado pola Mancomunidade de Concellos da Mariña, que foi aprobado pola unanimidade dos 16 concellos que conforman a comarca, estará dotado con tres millóns de euros e desenvolverase ata 2024.
Reyes Maroto: "Os tres niveis da administración colaboran nesta iniciativa que mellora a capacidade dos destinos"
"As candidaturas que recibimos nesta segunda edición do programa, un total de 301, practicamente duplican as do ano anterior (156 propostas), o que demostra o interese suscitado por esta iniciativa que inviste na mellora da competitividade dos destinos a través dunha estreita colaboración entre os tres niveis da administración", asegurou a ministra de Industria, Comercio e Turismo, Reyes Maroto, que participou na Conferencia. Os tres millóns do plan estarán achegados nun 45% polo Goberno, outro 45% pola Xunta e un 10% pola propia mancomunidade. "Foi un traballo técnico ben conformado, unha candidatura moi potente e un esforzo considerable que obtivo a súa recompensa", asegurou este mércores o presidente da mancomunidade e alcalde de Foz, Fran Cajoto.
"Hai que agradecer o labor da xente anónima que estivo traballando para que saíse adiante: o técnico de turismo da mancomunidade, a fundación Juana de Veiga e as administracións central e autonómica, porque sen ou seu apoio técnico e económico non se podería ter acadado", apuntou Cajoto, que quixo agradecer ao Goberno, "especialmente á Secretaría de Estado de Turismo, encabezada por Fernández Valdés, ou seu forte e decidido compromiso coa Mariña".
ACTUACIÓNS. O plan turístico busca aumentar os beneficios socioeconómicos do turismo na comarca e convertelo nun eixo para intentar deter a perda de poboación. Unha das liñas de traballo máis importantes será a potenciación e oficialización do Camiño do Mar, "ruta de peregrinación a Santiago esquecida e que discorre por todos os concellos costeiros", precisou Cajoto.
Outro dos eixos de actuación centrarase na creación de produtos que permitan actividades fóra de tempada vinculadas ao turismo activo e de natureza e seguindo a liña do turismo slow polo que a mancomunidade leva anos apostando. Neste sentido, Cajoto precisou que se porán en valor as fervenzas, traballarase en rutas de sendeirismo e de BTT e en definir unha rede de miradoiros, así como impulsar o turismo ornitológico. "Son accións que benefician a toda a comarca no seu conxunto e non a un concello de forma individual", dixo Cajoto.
Ademais, está contemplado establecer un modelo de xestión do geodestino que inclúe actuacións de concienciación en sustentabilidade, así como aumentar o coñecemento da demanda mellorando as capacidades das oficinas de turismo. Dentro da xestión turística, o plan tamén establece o seguimento da demanda para establecer sistemas de xestión de visitantes seguindo o modelo das Catedrais ou Fuciño do Porco se fose necesario.
Fran Cajoto: "A parte importante de promoción que inclúen estas medidas pode constituír un salto de calidade"
"O plan conta cunha parte promocional moi importante, que pode constituír un salto de calidade; temos as condicións e temos as ganas e agora, afortunadamente, temos os recursos", apuntou Cajoto, que adiantou que as actuacións previstas no plan empezarán a porse en marcha o próximo ano e terán continuidade en 2023 e 2024.
XUNTA. A Xunta acolleu con satisfacción "contida" esta concesión, porque segundo indicou o delegado territorial en Lugo, Javier Arias, "chega cun ano de atraso, algo moi prexudicial para as empresas deste sector, máis aínda na situación na que nos atopamos".
Segundo indicou Arias, o obxectivo deste plan é reforzar a confianza no viaxeiro e fomentar a comarca como destino seguro e desde a Administración autonómica consideran que "agora todos aqueles que viven do turismo non poderán beneficiarse deste proxecto tal e como estaba pensado nun primeiro momento". Arias tamén matizou que a Xunta xa comprometeu o ano pasado o 50% do orzamento deste proxecto.
EN ASTURIAS. Na veciña comunidade de Asturias elixíronse o dos vales de Aller e o da comarca de Avilés.
EN ESPAÑA. Os proxectos seleccionados sitúanse tanto en destinos rurais como urbanos e de sol e praia. Algúns dos elixidos foron o do Alto Asón en Cantabria, o de Salamanca en Castela e León, os de Vila de Eivissa e Fomentera en Baleares, o geoparque de Granada en Andalucía ou o Val do Alhama- Linares na Rioxa.
