Unha trintena de profesionais -nefrólogos, nutricionistas ou persoal de enfermería- asisten esta fin de semana á novena edición do taller de nutrición en pacientes con enfermidade renal crónica que organiza a unidade de Nefroloxía e Hemodiálise do Hospital Público da Mariña. Baixo a lema "Pescados e vexetais", 36 sanitarios procedentes de hospitais de toda España, aprenden sobre alimentación para poder dar estes coñecementos aos pacientes.
"É o único taller de formación de formadores a nivel nacional", destaca o nefrólogo Secundino Cigarrán, que destaca que na súa novena edición esta actividade xa está totalmente consolidada. "Este ano puidemos ampliar a 36 as prazas, porque antes tiñamos 26, pero aínda así once persoas quedaron en lista de espera e a inscrición leva pechada desde o pasado 15 de febreiro", explica Cigarrán, que subliña que as persoas que este ano quedaron fóra son as primeiras ás que se lles ofrece participar na edición do ano seguinte.
Unha das novidades deste ano, segundo explica o doutor Cigarrán, é que se analizará a obesidade nos enfermos con patoloxía renal crónica. Ademais, o tema central deste ano é a dieta atlántica, marcada polos vexetais e o peixe: "A nosa investigación en nutrición para enfermos renais permitiunos potenciar esta dieta, que é a que máis se consome nesta zona".
A primeira xornada do taller desenvolveuse este venres no salón de actos de Absa, que colabora coa actividade, e foron diferentes relatorios teóricos a cargo de María Luisa González Casaus, do hospital Gómez Ulla de Madrid; de Emilio González Parrra, da fundación Jiménez Díaz de Madrid; de Pablo Ureña Torres, do Clinique du Landy de Paris, e de María Ángeles Romero Rodríguez, catedrática de Tecnoloxía dos Alimentos na Facultade de Ciencias da Universidade de Santiago (USC).
