Un exemplar de xabaril que resultou ferido nun accidente ocorrido na zona de Lavandeiras, na estrada LU-862 á entrada de Xove desde Viveiro, tivo que ser trasladado ao centro de recuperación de O Veral, en Lugo, debido ás lesións que presentaba nas patas traseiras. O xabaril era un macho de tamaño mediano, que pesaba entre 50 e 60 quilogramos de peso, segundo as persoas que lle atenderon.
O animal irrompeu na calzada de xeito imprevisto provocando o sinistro dun vehículo que circulaba por esa zona do concello xovense. O accidente ocorreu cara ás sete e media da mañá de onte. O xabaril quedou ferido sobre a vía e tivo que ser atado para apartalo porque se revolvía contra as persoas que trataban de suxeitalo para que non accedese de novo á calzada, así como contra os propios vehículos que circulaban.
Axentes da Xefatura Territorial de Medio Ambiente e técnicos do centro de recuperación do Veral, situado en Lugo, desprazáronse ata a localidade xovense para rexistrar o contratempo e actuaron co apoio dos vixiantes do Concello de Xove, o que permitiu proceder ao seu traslado nun carriño especial.
COLISIÓN EN FOZ. Doutra banda, a rotonda de O Descanso, situada á entrada da localidade de Foz desde Fazouro, foi escenario algo antes do mediodía deste martes dunha colisión entre dous automóbiles que circulaban pola glorieta.
O sinistro saldouse unicamente con danos de carácter material e afortunadamente non houbo que lamentar danos persoais. Interveu unha dotación da Garda Civil do Subsector de Tráfico de Lugo, adscrita á compañía creada na localidade de Burela, para a realización do correspondente ateigado.
