Outros catro traballadores e tres usuarios da residencia de Xove deron positivo en covid-19 nas últimas PCR realizadas no centro –nas primeiras efectuadas tras rexistrarse o contaxio dunha traballadora deran negativo–. A empregada só estivo dúas horas no centro logo duns días libres e con todas as medidas de seguridade, pero ao ser un virus moi contaxioso puido ser suficiente, no caso de que poida confirmarse que ese é a orixe dos contaxios actuais.
Os residentes foron trasladados a un centro que a Fundación San Rosendo posúe en Ourense, especializado no tratamento do covid e en principio están ben e con síntomas leves. Pola súa banda, os traballadores están nos seus domicilios realizando a pertinente corentena.
As probas diagnósticas realízanse todas as semanas e, xa que logo, haberá que esperar ás seguintes para coñecer se o brote está controlado ou se expandiu máis.
Ademais xurdiron outros contagios soltos entre veciños, segundo confirmou o alcalde, Demetrio Salgueirou, quen espera que non houbese máis propagación na residencia, onde cumpren todos os protocolos e esixencias de Sanidade. O rexedor invita a seguir utilizando todas as medidas de seguridade, sobre todo máscara, distancia e redución de contactos con outras persoas, para evitar novos contagios.
Tres residentes do Hospital Asilo de Ribadeo dan positivo en covid-19
GALICIA. O número de usuarios con coronavirus en residencias de maiores en toda Galicia reverteu a súa tendencia á baixa e elevouse este xoves a 110 (once máis), tras detectarse 10 novos positivos en internos da DomusVi de Vimianzo (A Coruña), onde xa son 19 os residentes contaxiados.
Segundo os datos do Servizo Galego de Saúde e a Consellería de Política Social, nas últimas 24 horas notificáronse dous falecementos e 13 positivos en usuarios de residencias galegas; así como os casos de catro empregados e un alta, que sitúa a cifra de traballadores con coronavirus en 121 (tres máis).
En concreto, deron positivo 10 usuarios e dous empregados da DomusVi de Vimianzo; tres maiores da Residencia Hospital Asilo San Sebastián e San Lázaro de Ribadeo (Lugo); un empregado de Remanso-Claudina Somoza, na Coruña, e un traballador da nosa Señora das Dores de Forcarei (Pontevedra). Por outra banda, só reportouse un alta, a dun empregado da DomusVi de Barbadás (Ourense).
O maior brote entre usuarios atópase na DomusVi de Vimianzo, con 19; seguida do CRAPD Vigo II, con 17; a residencia Soremay, en Pontevedra, con 15; A Saleta de San Cristovo de Cea (Ourense), con 15; a Pontevedra de Vilaboa, con 12, e a Vila do Conde de Gondomar (Pontevedra), con 9, entre outros focos menores.
En canto aos traballadores, un total de 121 teñen o virus, de modo 13 están en Asilo de Vilalba; 10 en DoralResidencias de Mos (Pontevedra); 8 en DomusVi de Ribadumia (Pontevedra), e 8 nos Miragres de Barbadás (Ourense), entre outros contaxios.
Respecto dos centros de atención a persoas con discapacidade, rexistran catro traballadores contaxiados (igual que onte): dous en Fogar San Rafael de Vigo; outro na San Vicente de Paúl, de Lugo; e un último empregado no CAPD de Sarria (Lugo).
