O presidente do comité de empresa de Alcoa en Avilés, Sergio Sobrido, mostrou este venres o seu convencemento de que a multinacional terminará negociando coas autoridades a súa continuidade. "Estamos seguros de que a compañía sentará, obrigada polo ministerio, a negociar unhas condicións para seguir operando", dixo.
Nesa liña, o presidente do comité de empresa da planta de Alcoa na Coruña, Juan Carlos López Corbacho, reclamou ás administracións que se poñan a traballar para buscar unha saída que evite o peche desta fábrica e a de Avilés, coincidindo cunha reunión co delegado do Goberno en Galicia, Javier Losada. "Hai solución, se hai vontade política", insistiu Corbacho, quen vinculou o anuncio de peche "cun problema de regulación do marco eléctrico" o que, segundo expuxo, está a deixarlles "en peores condicións" respecto doutras plantas de Alcoa.
Sobrido cualificou de "reconfortante" o interese mostrado polos Reis de España sobre a súa situación, algo que revelou á primeira hora do día o presidente do Goberno asturiano, Javier Fernández.
Traballadores e políticos concentráronse este venres ante a planta de Alcoa en Avilés ao berro de Alcoa "non se pecha", no que foi o arranque dun calendario de mobilizacións tras a decisión da multinacional do aluminio de pechar a factoría asturiana e a da Coruña. Tamén na planta herculina concentráronse os traballadores e prenderon lume a numerosos neumáticos.
A empresa anunciou este mércores a súa intención de iniciar un período formal de consultas para levar a cabo un despedimento colectivo nas dúas plantas, polo que se verán afectados un total de 686 traballadores. Para Sobrido, a reacción unánime apoiando aos traballadores por parte das máximas autoridades demostra que están a defender unha causa xusta e que a súa reclamación "está a chegar onde ten que chegar".
Preguntado sobre se Alcoa pode seguir operando, Sobrido dixo que nas actuais condicións é difícil polos custos enerxéticos. Por iso, insistiu na necesidade de introducir as modificacións oportunas no sistema de tarifas e homologar as plantas en canto ao prezo da enerxía co resto de instalacións europeas.
Dixo que así a planta de Alcoa en Avilés podería seguir operando. En canto á falta de investimentos da multinacional, Sobrido dixo que Alcoa tampouco investiu noutras instalacións, como as galegas da Coruña ou San Cibrao. "Ningún goberno obrigoulle a modernizar as plantas", lamentou.