O presidente da Deputación de Lugo, José Tomé, reclamou este martes aos representantes da Xunta que "se deixen de fotos e de declaracións" e se "impliquen dunha vez" na procura dunha solución que permita o mantemento dos empregos na fábrica de aeroxeradores de Vestas en Viveiro.
En declaracións aos medios de comunicación, antes de participar no pleno ordinario da Deputación, Tomé apuntou que o que está a suceder coa fábrica de aeroxeradores, un centro de traballo que Vestas pretende pechar a final de ano, "non é competencia do Goberno".
Recordou que a Xunta ten "transferidas as competencias", polo que lle pediu que busque "algún tipo de solución" para que non se sigan perdendo empregos industriais en Galicia, en xeral, e na Mariña, en particular. "Non sabemos nada da súa folla de ruta", insistiu Tomé, quen lamentou que "logo de 33 anos" non exista "un plan industrial" para Galicia, nin para A Mariña. Desde o seu punto de vista, o Goberno galego demostrou unha "inutilidade absoluta" neste ámbito.
Tomé quixo expresar "toda a solidariedade" da institución cos traballadores afectados por esta decisión da multinacional.
