VIVEIRO. O colectivo que agrupa aos 17 taxistas da cidade, Taxis de Viveiro Asociación, retirou a cabina de teléfono da Praza de Lugo como pedía o Concello pero mantén o número, que segue funcionando como unha central para os seus asociados. A alcaldesa, María Loureiro, convocou para mañá unha comisión cos portavoces para analizar os pasos a seguir co obxectivo de que haxa un único número de teléfono para todas as licenzas de taxi do concello —incluídas as dos taxistas das parroquias— e cumprir así a ordenanza municipal.
Os integrantes de Taxis de Viveiro Asociación realizaron unha asemblea na que decidiron retirar a cabina telefónica da beirarrúa —como esixía o Concello, ao estar en dominio público— pero o número de teléfono, 982.56.00.26, «seguirá en servizo de xeito virtual, eliminándose a contaminación acústica e mellorando o servizo para os usuarios do taxi», din desde o colectivo, que pide desculpas «polas posibles molestias ocasionadas» e agradece a «fidelidade» dos seus clientes. «Vímonos obrigados a esta acción polo goberno municipal, demostrando unha vez máis que acatamos a legalidade vixente en todo momento», engaden.
Os taxistas da cidade recordan que tamén segue funcionando o teléfono que hai na estación de autobuses, que é o 982.56.18.50, ademais do teletaxi, o 671.26.55.55.
Sobre a obrigación da ordenanza de establecer un número de teléfono único para todos os taxistas do municipio, desde a asociación da cidade comentan que a normativa non establece quen ten que fixar ese número.
Pola súa banda a alcaldesa convocou aos portavoces municipais a unha reunión mañá para abordar este asunto. Explica que a súa intención non é ir en contra dos taxistas da cidade, senón que se cumpra a ordenanza municipal. Todos os taxistas do municipio teñen que ter acceso a un único número de teléfono», insiste Loureiro, quen comenta doutra banda que «deben dar o mellor servizo aos veciños», pois no Concello recibiron «queixas de que non están na parada».
