lunes. 20.09.2021 |
El tiempo
lunes. 20.09.2021
El tiempo

De tales remos, tales achas

REMEROS DE RIBADEO QUE ENTRENAN CON SUS HIJOS-JM ALVEZ
Antón e Miguel Balsa (esquerda), e Mateo e Mauri Monteserín. J. Mª ÁLVEZ
Mateo e Antón, os fillos de Mauricio Monteserín e Miguel Balsa, seguen o ronsel dos seus pais, dous remeiros de referencia

O Club de Remo de Ribadeo converteuse nos últimos anos na referencia que fora no pasado para os mozos que queiran practicar este deporte na Mariña e no occidente asturiano. Moito mérito do traballo que vén desenvolvendo na entidade téñeno dous históricos do remo ribadense: Mauricio Monteserín Mauri e Miguel Balsa, que puxeron experiencia, esforzo e dedicación para un crecemento continuo desde que colleron as rendas do club no ano 2015, logo de máis de 10 anos pechado. Ademais do seu amor polo remo, outra das razóns que levou a Monteserín e Balsa a manterse á fronte do club ribadense foi a presenza dos seus fillos, Mateo Monteserín -—13 anos— e Antón Balsa —12 anos—, entre as promesas que figuran na entidade. Xa se sabe que de tales remos, tales achas.

Miguel Balsa comezou a practicar remo en Ribadeo aos 13 anos e na súa prolífica traxectoria figuran varios títulos de campión de España de bateis, entre outros logros. "Cambiei de club e fixen tanto banco fixo como móbil dependendo de onde estivera", comenta o remeiro, que comezou a súa andaina xunto a Mauricio Monteserín e foi tamén xunto a el cando decidiu recuperar o club de remo ribadense. "Foi non 2015 cando xa estabamos os dous asentados en Ribadeo. A única intención era ofrecerlle aos rapaces unha alternativa que xa non existía dende había dez anos", sinala.

Balsa nunca presionou ao seu fillo Antón para unirse ao club e non foi ata que cumpriu os nove anos cando empezou a remar. "Nunca quixemos dicirlle nada porque xa se sabe que ás veces basta con empuxalo a facer unha cousa para que non lle guste. Pero participou por vez primeira nunha competición aos dez anos e enganchouse completamente", explica.

"Recuperamos o club de remo ribadense non 2015, cando xa estabamos os dous asentados en Ribadeo. A única intención era ofrecerlle aos rapaces unha alternativa que xa non existía dende había dez anos"

Tanto Antón como Mateo adestran catro días á semana e non menos dunha hora e media en cada sesión, algo que pode considerarse excesivo para a súa curta idade, pero fano cunha actitude exemplar . "Chova, faga frío ou sarabee, Antón sempre ten boa predisposición para ir adestrar, é algo que parece que sempre fai a gusto, nunca hai que incentivalo ou presionalo. Ás veces levántase cando o resto quedamos na cama, colle a súa bicicleta e marcha ao seu adestramento de remo sen que ninguén lle diga nada", sinala Miguel Balsa, que recoñece sentirse "orgulloso" da afección do seu fillo. "Para min, para a miña doa, Demelsa, e para a miña filla Aitana, que lle poña todas as súas ganas e ilusión e que se sinta feliz fainos tamén felices", di.

Como pai, Balsa ten claro os consellos que lle dá ao seu fillo respecto ao remo: "Dígolle que desfrute ao máximo, recórdolle que se compite segundo se adestra e pídolle que sempre lle faga caso ao seu adestrador, sexa quen sexa".

A carreira no mundo do remo de Mauricio Monteserín convérteo no deportista desta modalidade máis importante da historia da Mariña. No seu palmarés figura a participación nos Xogos Olímpicos de Sydney, no ano 2000 e en catro campionatos do mundo. Tras comezar no club de Ribadeo, pasou por varios clubs de remo en banco móbil e traiñeiras e regresou en 2012 á súa localidade natal para recuperar o club de remo xunto ao seu compañeiro e amigo, Miguel Balsa.

Igual que Antón Balsa, tamén Mateo Monteserín segue os pasos do seu proxenitor, ao que xa acompañaba con sete anos cando saía a remar. "Baixaba comigo, pero o que lle gustaba realmente era ir na zódiac", comenta o seu pai, que viu como paulatinamente comezaba a interesarse polo remo. "Foise acostumando aos movementos, cada vez amosou máis interese e ao final quedáronselle cousas", explica Mauri.

"Na actualidade dispoñen de moitos máis medios e posibilidades e sobre todo creo que teñen a vantaxe de dispoñer de adestradores con máis experiencia"

Este considera que hai grandes diferenzas de cando empezaron Miguel e el á actualidade. "Agora dispoñen de moitos máis medios e posibilidades e sobre todo creo que teñen a vantaxe de dispoñer de adestradores con máis experiencia. Dentro diso hai similitudes á hora de inculcarlles certos valores como a puntualidade e responsabilidade á hora de acudir aos adestramentos, ou espírito de sacrificio", explica o exremeiro, que agora é adestrador. "Ás veces a Mateo cústalle diferenciar a figura do pai e do adestrador. Ao final o é un máis dentro do club cando estou exercendo e seguramente sae prexudicado porque é ao que máis se lle esixe".

Respecto das posibilidades de seguir crecendo no mundo do remo, Mauri teno claro. "Os estudos son o primeiro. A esta idade teñen que ver o remo coma un deporte e gozar del, non se pode falar nin pensar no profesionalismo porque iso sería un erro grave", explica.

UNHA PARELLA DE NIVEL. A pesar da súa mocidade, Antón e Mateo proclamáronse xa campións galegos de alevíns no dobre scull antes da pandemia e tiñan moitas opcións de medallas no campionato de España, pero non se celebrou. Mauri Monteserín fala das súas calidades e veos "diferentes, pero complementarios". "Antón é forte, moi desenvolvido fisicamente e Mateo é máis fino, pero compensa a súa falta de potencia cunha boa técnica", di.

Canteira: Máis dunha vintena de deportistas no club ribadense
Tanto Mauricio Monteserín como Miguel Balsa móstranse moi satisfeitos da evolución do club e de contar habitualmente con máis dunha vintena de deportistas entre as categorías de benxamíns e xuvenís. Ambos tiñan claro que o único obxectivo da recuperación da entidade era para darlle outra alternativa deportiva aos máis novos e a resposta foi moi boa nos seis anos que levan.

 

En curto
GALARDóNS. 10 medallas
Son as que acumulan xa a pesar da súa curta idade entre Mateo Monteserín e Antón —Balsa cinco para cada un— nas diferentes competicións autonómicas e nacionais nas que participaron, desde benxamíns. Ambos renden a alto nivel tanto no skiff individual como no dobre scull.

PETICIÓN. Aos responsables do club gustaríalles ter máis horas de mar
Miguel Balsa considera que depender tanto das mareas esixe ás veces un sacrificio aos novos remeiros de ter que madrugar moito para poder adestrar no mar. O presidente do club pide un esforzo ás institucións para que poidan facer unha dársena ou unha pequena canle que facilite a saída á auga para os remeiros. O que si agradecen desde a entidade é a calidade do local social que ten o club na actualidade.

XOIAS. Nerea Lago está coa selección española xuvenil
Mateo Monteserín e Antón Balsa son dúas das xoias do club, pero a máis consolidada é a xuvenil Nerea Lago, medallista nacional en numerosas ocasións e, actualmente, concentrada coa selección española da súa categoría, coa que ten grandes posibilidades de acudir ao Mundial. Nerea Lago é a referencia máis próxima dos máis novos do club ribadense para saber que con traballo e dedicación pódese chegar lonxe.

De tales remos, tales achas
comentarios