Un familiar dos residentes nunha vivenda do lugar de Toxeiras, pertencente á parroquia de Landrove, en Viveiro, alertou á central do 112 en Galicia cara ás nove e dez da noite deste martes dun incendio nunha cheminea da casa dos seus parentes, que solicitaron a súa axuda ao atoparse asustados e non saber como actuar para sufocar o foco.
O lume non causou feridos e o foco, que presumiblemente se declarou por falta de limpeza do conduto, non revestía maior gravidade, segundo indicaron os servizos de urxencia.
Os bombeiros do parque comarcal de Viveiro desprazáronse ata o lugar para extinguir o lume e realizar o pertinente control de temperatura a fin de descartar que puidese reactivarse o lume.