Din que das adversidades xorden ideas e avances. E debe ser verdade que o inconformismo vivariense é algo arraigado para adiantarse. Se un grupo de mozos foron capaces de armar en casa un macrofestival como o Resu, ¿por que non probar correntes fluviais para o surf en canles da contorna?
O domingo Diego e Juan Carlos cataron a onda que deixa a represa de Landrove, á saída da potabilizadora de auga. Foi tan só un test e a verdade é que Mini -como é coñecido Diego, o optometrista da Óptica Viveiro-, ten bo ollo para as ondas e pensou que a corrente que hai logo da rampla da estación apunta xeitos. O torrente e a forza do río son imán para un bodyboarder e os surfers andan bastante de bajón ao non poder desprazarse ás praias, debido ao peche perimetral pola pandemia. Pero un pode organizarse fronte a ela, como fixo el mesmo ao ofrecer descontos con bonos en lentes para quen consumise na hostalería local, ou agudizar o enxeño dun lecer a medio camiño entre o surf e o snowboard.
Esteiro ou San Román son mares e areas de Xove e O Vicedo, así que sen un plan de domingo que permita saír cara ao exterior da ría, Diego e o seu amigo Juan Carlos lanzáronse á crecida do Landro, onde son capaces de manexarse perfectamente cos seus coñecementos e forma física. Juan Carlos pouco puido facer coa táboa pero Mini tentouna na crista continua dunha onda que, no entanto, "vai moi plana, tinga que levantar aínda algo máis".
"Por moito que remes -explicou-, cansa pois trae moita forza", dixo, e as sensacións tamén son distintas sobre a auga doce que entre a salinidade do mar. Aínda así, sen ser o plan total do domingo, pasaron un bo intre nunha localidade surfera mariñá moi recoñecida e sempre dada á acción e a probar o novo.
Quizais se poida aproveitar a idea ou perfeccionar un lugar da canle onde os adictos non dependan dos ventos e o estado do mar. Sempre pendentes do parte de ondas. á fin e ao cabo, noutros lugares terra dentro xa se encomendaron ás ondas artificiais para sacar mollo aos neoprenos e táboas. Incluso con inventos alemáns que xeran ondas artificiais en fosos e piscinas.
É o caso do Citywave, do centro comercial X-Madrid de Alcorcón, unha instalación similar á que xa existe noutras cidades europeas. Quizais no país dos mil ríos tamén poidan reservarse moi pronto espazos para un deporte acuático que este mesmo ano estrearase como olímpico. En Viveiro, Diego e Juan Carlos debutaron sobre as augas do Landro. Habilitar unha onda con calidade suficiente sería un achado para o lecer e a economía.
