O doutor Fernando Simón sinalou este luns que as comunidades son as que toman as decisións do confinamento e dos prazos e no caso da Mariña, onde os casos activos subiron en vinte e catro horas de 99 a 119, pediu facelo, con carácter xeral, "con moitísimo coidado".
"Ao cuarto ou quinto día tense que decidir se se estende o período ou non. Son as comunidades as que toman as decisións e as que terán que valorar se é o máis adecuado ou non. A miña percepción é que a valoración se ten que facer con moitísimo coidado", subliñou, un día despois de que a Xunta ordenase o peche durante cinco días, prorrogables, dos accesos a esa zona costeira.
Só no caso de que as comunidades non apliquen as medidas que afecten a máis dunha rexión ou se comece "a non saber o que está a pasar" é cando Sanidade, indicou en rolda de prensa, exporá "accións de Estado que poden requirir cousas como as que vivimos no"pasado , aínda que Simón espera que non se volvan a producir".
Ademais de con Cataluña, onde está o brote máis preocupante, os responsables de Sanidade prevén reunirse con outras comunidades afectadas por este fenómeno como son Galicia, Aragón e Madrid –onde se detectou un brote que afecta a cinco persoas– para intercambiar información e respostas que "reforcen o control" dos focos.