Adrián Ben finalizou na sexta posición nos 800 metros lisos ao aire libre que disputou este sábado dentro do World Athletics Continental Tour Silver de Madrid. O vivariense non puido mostrar o seu excelente final e na recta de meta non puido superar a ningún dos seus adversarios nunha carreira na que se impuxo o holandés Tony Van Diepen.
A proba comezou cunha saída fulgurante e onde Ben empezou na cola do grupo, penúltimo. Unha vez retirouse a lebre, foi Saúl Ordóñez o que colleu a cabeza da proba con strong <>a intención de facer unha boa marca e intentar gañar. Pero na recta final xa entrou na cabeza o holandés, que mantivo o liderado ata o final e gañou cun tempo de 1:45.17. A Saúl Ordóñez adiantoulle nos últimos metros o irlandés Mark English, que terminou a carreira cun tempo de 1:45.22 mentres que Ordóñez fixo catro centésimas máis, 1:45.26.
En cuarto lugar clasificouse Pablo Sánchez-Valladares cun crono de 1.45.62 e completou o top 5 Álvaro de Arriba, cun tempo de 1.45.75. Adrián Ben non puido baixar dos 1.45 e parou o cronómetro nos 1.46.16.
Esta era a última proba para o vivariense antes do Campionato de España que se disputará en Xetafe o próximo fin de semana. Ben, que xa ten a mínima para os Xogos de Tokio, necesita facer unha boa actuación na localidade madrileña para que o seleccionador nacional confíe nel para ir a Xapón.