O vivariense José María Vázquez, xerente da firma Serpa, propón aos concellos da Mariña lucense un plan preventivo para reducir durante o próximo ano a incidencia da praga de avispas velutinas ou asiáticas na comarca. O proxecto inclúe un trampeo na primavera a fin de capturar o maior número posible de raíñas fundadoras, seguido da retirada exprés permanente dos niños localizados.
O xerente de Serpa xa falou con todos os concellos da Costa, así como con outros limítrofes, como Muras, para presentarlles esta opción. Con ese obxectivo expón que cada concello reserve 3.500 euros nos próximos orzamentos para tratar de rebaixar á metade o número de niños existentes no seu territorio.
Vázquez cre que a iniciativa tamén podería canalizarse a través da Mancomunidade, se así se acorda. Estima que así podería reducir cerca do 70% a afección da velutina e que A Mariña podería ser "punto de referencia a nivel de Europa para minimizar o seu impacto e controlar este problema", asegura.
José María Vázquez considera que a posta en marcha dese plan contribuiría a diminuír de forma considerable os riscos, evitando danos persoais e incluso falecidos, como o ocorrido en xullo de 2018 en Viveiro, municipio onde este ano retirou 248 avisperos, menos da metade que no pasado (528), un dato que considera "asombroso". No Valadouro quitou 160 e de Burela extraeu cinco, unha cifra que está moi por baixo da media.
