A mesma xornada da publicación do Plan Básico Autonómico no Diario Oficial de Galicia, pensado como instrumento urbanístico básico para os municipios, volvían aparecer na ría de Viveiro regueiros de espumas procedentes da vertedura da depuradora de residuais.
O motivo, a coñecida rotura do emisario que deixa eses residuos na bocana do porto de Celeiro, fronte á praia e a lonxa pesqueira. Alí mesmo, corroboran o problema: "Chegas o luns, asómaste á fiestra e aí está a vertedura; suponse que é auga tratada pero non fai nada dentro da ría e debería corrixirse de inmediato", sinala Jesús Lourido, xefe de flota de Porto de Celeiro e xerente da OPP-77.
Como se publicou, a reparación segue sen concretarse, mentres a Consellería de Medio Ambiente da Xunta de Galicia e o Concello de Viveiro cúlpanse do atraso nos preceptivos informes ambientais.
O problema ecolóxico e de aseo salta á vista mentres se promulgan normas e distintas organizacións critican a exigua e mal xestionada Rede Natura 2000, o que provoca desprotección neses e outros espazos. Tamén denuncian a perda de patrimonio natural e biolóxico "e de especies que son bioindicadoras da cualidade dos nosos ecosistemas ou fonte de recursos para a nosa especie humana".
Respecto diso, a ría de Viveiro non só perdeu os seus bancos marisqueiros (ameixa, berberecho, coquina...) en Covas e outras praias senón que, ademais da súa destrución polos recheos urbanos, seguen sen corrixirse outros moitos puntos de vertedura no municipio, e a capacidade da depuradora é insuficiente. O PXOM de Viveiro tamén segue sen aprobarse, encallada a súa tramitación nalgún departamento autonómico.
No entanto, no Plan Básico Autonómico aparece explicitamente a Costa da Mariña Occidental como zona de especial protección dos valores naturais (xunto á ría de Foz, a do Masma,os ríos Eo e Ouro, As Catedrais e Ribadeo), e incluso o acosado Landro está incluído na Rede Natura 2000 como zona de especial protección das aves.
En definitiva, a nova normativa dispón como ha de construírse en espazos moi protexidos, desde as fachadas a outros elementos, especialmente nos municipios de menos de 5.000 habitantes, ou delimita áreas de dominio público marítimo e portuario, mentres obras básicas do saneamento público seguen pendentes.
