As xornadas de pesca serven para palpar o ambiente do sector, que non oculta a súa contrariedade con algunhas das decisións que preparan as administracións, tanto europea como española, e sobre as que apenas teñen decisións. Falta o "día a día" nos plans estratéxicos e é clara a "frustación", recordou Sergio López, o responsable da OPP lucense, apostilando a intervención de Javier Garat, secretario xeral da patronal da pesca, Cepesca.
Garat interveu desde o aeroporto das Palmas, pouco antes de participar nunha reunión da UE con Mauritania, pois é tamén o presidente da Asociación das Organizacións Nacionais de Empresas Pesqueiras da Unión Europea (Europêche). Unha charla na que reclamó "as mesmas regras de xogo para todos" e queixouse do "estritas" que poden ser as normas europeas para os estados membros "pero pode chegar produto doutros países".
Neste sentido, desde o público presente na sala queixáronse das importacións de países asiáticos ou da dobre vara de medir en canto ás sancións, pois "a que en España se salda con 60.000 euros en Alemaña múltase con 600", lamentou un armador.
"Está ben que os obxectivos sexan ambiciosos, pero deben ser realistas e alcanzables", apostilou Garat, quen non dubidou en afirmar que "a UE é unha máquina de crear euroescépticos no sector pesqueiro". Así, recordou o regulamento de control, contra o que se manifestou a flota mariñá polo feito de ter que levar cámaras a bordo, pois nos tratan coma se fósemos delincuentes", e por levar a cabo unha "política de escaparate".
O presidente de Cepesca defendeu o valor dos pescadores e dun traballo para o que falta substitución xeracional
DESCOORDINACIÓN. As queixas esténdense tamén ao Goberno central, ao que critica pola "súa falta de transparencia" en relación á nova Lei de Pesca. "Non se nos facilitou o borrador da normativa aínda que o que vimos non nos gusta e temos unha preocupación total por cuestións como os dereitos de pesca ou as cotas de repartición", advirte. Unha crítica á que suma a "descoordinación" entre ministerios, pondo como exemplo a imposibilidade da flota de comercializar marraxo dientuso tras ser pescado legalmente.
O presidente de Cepesca defendeu o valor dos pescadores e dun traballo para o que falta substitución xeracional. Cre que a FP dual, que se vai a impartir en Euskadi e Asturias, pode ser unha clave para animar aos mozos, ademais das escolas náutico-pesqueiras. A falta de incorporacións súplese con tripulación estranxeira, pero tamén tiveron problemas para enrolar en Gran Sol e longa distancia a mariñeiros indonesios "por non ter o título esixido a pesar de que teñen demostrada a súa total competencia", afirma.
