A firma Sargadelos volve pór en marcha as súas visitas guiadas ás plantas de produción de Cervo e Sada a partir do próximo luns, día 1 de xullo. No caso da planta cervense serán dúas diarias, ás once da mañá e á unha da tarde, e en Sada están previstas ás doce do mediodía. "Ante o grande interese que esperta Sargadelos, un ano máis queremos transmitir os nosos valores de deseño, calidade e compromiso dando a oportunidade ao visitante de coñecernos desde dentro", explican desde a firma e engaden que a finalidade destas visitas guiadas é "fomentar e preservar un dos fitos do patrimonio cultural, turístico e empresarial de Galicia con máis de 210 anos de historia".
Durante estas visitas, que terán unha duración estimada de entre media hora e corenta minutos, o visitante poderá coñecer cada un dos procesos polos que pasa a peza de Sargadelos ata converterse nunha peza única de porcelana da máis alta calidade. "Trátase dun proceso moi laborioso, case artesanal e de gran complexidade manufactureira que se mantivo vivo durante séculos e que constitúe un tesouro en si mesmo", subliñan desde Sargadelos.
Ao longo de todo o ano, en horario laboral das dúas plantas de produción, Sargadelos mantén aberta a posibilidade de poder visitar todo o proceso produtivo de forma libre e sen guía. Segundo explican desde a firma, esta posibilidade provoca "grande interese no visitante" ao poder ver in situ como se fai cada peza e insiste en que o proceso produtivo "foxe da industrialización para achegarse ao artesán, feito que pon en valor que cada unha das nosas pezas sexa única e representativa da nosa terra".
Ademais, durante todo o ano está aberta a posibilidade de poder facer tamén visitas guiadas, pero neste caso teñen que ser para grupos e debe facerse unha reserva previa. Para iso, é necesario contactar coa firma no número de teléfono 982.55.78.41 ou ben a través da dirección de correo electrónico sargadelos@sargadelos. com.
