Das 512 cubas de electrolisis da fábrica de aluminio de San Cibrao este só quedaban activas unhas sesenta, polo que se non hai imprevistos cumprirase a previsión de Alcoa de cesar completamente a produción entre mañá e o venres para retomar a actividade ao 100% a partir do 1 de xaneiro de 2024, en base ao compromiso da multinacional.
Segundo explican os propios operarios apáganse cada día 24 cubas, nas quendas de mañás e de tardes, con 12 en cada un. "No de noite coan o baño de criolita para ao día seguinte parar outras 24", precisan.
O comité demandaba unha reunión de seguimento do plan de Alcoa para antes de que se apagasen todas as cubas e este encontro, con participación de Xunta e Goberno, celebrarase previsiblemente mañá.
Co cesamento da actividade nas series de electrolisis e no departamento de ánodos empeza unha nova etapa para os seus traballadores, que durante o parón continuarán co seu calendario habitual a quendas e encargaranse de distintas tarefas de limpeza e mantemento das instalacións, especialmente de face á preparación da volta á posta en marcha e á chegada dos investimentos comprometidos por Alcoa. Os operarios destes departamentos tamén levarán a cabo acciones de formación en materias como seguridade, procedementos de traballo ou manexo de equipos móbiles, ademais de para a reactivación das series.
Na fundición, que segue activa, parte do persoal irase formando de forma rotativa en distintos postos para alcanzar o maior grao de polivalencia.
José Tomé
O presidente da Deputación, José Tomé, comprometeuse a falar da situación de Alcoa coa ministra de Industria, Reyes Maroto, e co secretario xeral Raül Branco, "en canto teña ocasión" para trasladar a preocupación polo futuro da fábrica.