OS CANTOS de serea cada vez son máis enérxicos en San Cibrao. Achégase A Maruxaina, unha serea lendaria que para uns era salvadora, porque evitaba que os barcos acabasen chocando cos illotes dos Farallóns, e para outros unha arpía, xa que atraía aos mariñeiros cara a unha morte segura.
Sexa como for, os veciños da tranquila vila sancibrense contan as horas para que dea comezo a súa festa máis icónica e multitudinaria. Aínda que o xuízo á serea, acto en torno ao que vira esta festa, aínda non será ata a medianoite do sábado, o venres xa comeza o programa oficial co chupinazo ás sete da tarde, que servirá de reclamo para que os maruxainos concéntrense na Prazoleta e enchan o "bandullo" cunha degustación de empanadas galegas e bolos preñados.
Co estómago en condicións, ás nove da noite será o momento no que a Asociación Amigos da Maruxaina desvele quen é a Maruxaina ou o Maruxaino de Honra deste ano.
O GRAN DÍA. O sábado será o gran día para os maruxainos, que encherán San Cibrao ataviados coa tradicional vestimenta mariñeira, composto de camisa ou camiseta branca e saia negra, elas, e pantalón azul, eles, xunto á imprescindible pañoleta ao pescozo.
As actividades comezarán tras o chupinazo das once da mañá, cun taller de cestería, pasacalles pola vila e un fotomatón maruxaino.
A praia do Torno converterase no epicentro a partir das sete da tarde cos Xogos Maruxainos, que darán paso ás once da noite ao desembarco da serea e ao gran xuízo popular de medianoite. Exculpada ou condenada a Maruxaina, a festa rematará cunha gran quiemada popular e verbena.