Cando o piragüismo mestura a aventura e a competición aí adoita estar Rodrigo Navarro. O padeeiro do CP Viveiro Urban Hotel é xa todo un clásico dalgunhas das probas máis particulares que se celebran en diferentes puntos do mundo e acaba de regresar da Regata do Río Negro, a competición por etapas máis longa do mundo, con 277 kilometros.
A proba, que cruza boa parte da Patagonia arxentina, entre as cidades de Neuquén e Viedma, reúne a un gran número de padeeiros, distribuídos en categorías. Navarro foi un deles, participando no K2 Máster A compartindo responsabilidade no barco co piragüista arxentino Emanuel Carniceiro, do club de canotaxe A Pobrecita.
Tras o éxito alcanzado en 2019, onde foron segundos, nesta ocasión quedaron a piques de subir ao podio, ocupando a cuarta, cun tempo total de 15 horas e 44 segundos.
A pesar de non repetir como medallista, Navarro mostrouse moi satisfeito coa experiencia e incluso co rendemento, xa que ademais "este tipo de probas son a mellor preparación posible na pretemporada de cara ao campionato galego de inverno, que é o principal obxectivo".
Para seguir con esta preparación, o padeeiro vivariense desprazarase ás Illas Canarias para tomar parte noutra das probas que leva xa anos facendo: a Ocean SurfSki Lanzarote World Cup, onde tamén se reúnen grandes especialistas mundiais nacionais e internacionais.
