O orzamento municipal de Ribadeo para 2019 achegarase aos dez millóns de euros dos cales un estará destinado directamente a investimentos, segundo explicou este martes nunha sesión plenaria de carácter ordinario o concelleiro de Economía e Facenda, Vicente Castro.
O edil nacionalista defendeu un orzamento que, segundo asegura, cumpre a regra de estabilidade e o tope de gasto pero, ademais, aumentará o remanente positivo das arcas municipais.
Na oposición o deseño do mesmo foi aplaudido polo portavoz municipal do Partido Popular, Jesús López Penabad, quen se congratulou de que ao fin atendesen unha reivindicación que expuxeron en varias ocasións durante os últimos catro anos e contemplasen unha partida para reparar o estadio municipal Pepe Barrera.
SÓ SEN RISCO. Pero a alegría de López Penabad foi contida de inmediato polo propio alcalde ribadense, quen lle apuntou que todas as tramitacións necesarias para sacar esas obras adiante levaranse a cabo só se dispoñen de financiamento tanto da Xunta como da Deputación.
Polo momento, explicou Suárez Barcia, non teñen contestación de ningunha das dúas administracións sobre este asunto, polo que di non saber que é o que vai suceder no futuro con el.
O que si recoñeceu é que segundo os seus cálculos ao longo da semana que vén estará listo o proxecto que será necesario levar a cabo para mellorar o Pepe Barrera.
Actualmente esas instalacións atópanse en moi mal estado por diversas cuestións. A máis peliaguda de todas elas é o estado do terreo de xogo, que se deteriora cando chove durante algúns días de forma consecutiva e non drena practicamente nada, co que se forman enormes charcos que imposibilitan disputar os encontros. Isto fixo que o propio Ribadeo F.C. tivese que desprazarse ata outras localidades como A Pontenova ou Friol para realizar os seus adestramentos na campaña pasada.
Pero Suárez Barcia non se mostrou partidario de lanzar as campás ao voo co proxecto, porque dixo que o importante é licitalo e que para iso precisa o apoio tanto de Xunta como de Deputación e dixo que non sabe se poderá conseguilo.
REIVINDICACIÓN. Todos os edís do BNG máis os dous do PSOE puxeron camisetas durante o pleno e despois do mesmo para apoiar as reivindicacións da Plataforma Sanitaria da Mariña e reivindicar a dotación dun pediatra estable para Mondoñedo, Lourenzá e Barreiros.
