O Ribadeo Indiano 2019 devolverá o próximo fin de semana á vila mariñá ao ambiente de principios do século XX. Reinará a cor branca, xunto á música e tradicións da época. O programa oficial, que alberga actividades para todos os públicos, xa foi desvelado pola organización.
O teatro de Ribadeo acolle o venres 12 o pregón oficial a cargo do arquitecto Ernesto Cruzado, a partir das sete e cuarto. Acto seguido, ás oito menos cuarto, terá lugar un dos pratos fortes da presente edición. O grupo Compay Segundo ofrecerá o seu espectáculo musical "De ida y vuellta" en idéntico escenario.
Para as persoas que prefiran gozar da diversión na rúa, o cuarteto tradicional Illa Pancha amenizará a baixada ao porto de Porcillán, onde o grupo de teatro local representará a obra A chegada a Cuba. A banda municipal tomará a substitución artística ás nove.
A subida ao porto tampouco estará exenta de música, pois haberá actuacións de Habana Café, o coro Sagrado Corazón e A lo cubano ata a madrugada no quiosco da música.
O sábado 13 continúa a festa cun espazo reservado para os que prefiran deleitarse co mercado de produtos de ultramar no barrio de San Roque. A praza de abastos será o lugar elixido para a exposición de coche de época, ás doce.
Tamén, Nacho Habanero e o grupo Atalaia animará as rúas durante unha xornada na que os máis pequenos terán o seu espazo de xogos e un taller de cometas ao mediodía, en San Roque.
FESTIVAL DE HABANEIRAS. Outro dos puntos de interese protagonizarao a vixésimo quinta edición do Festival de Habaneras e Música Hispanoamericana, que terá lugar no barrio de San Roque, ás oito e media.
Antes, o teatro será a sede da conferencia "A epopea indiana: crónicas e novelas", a cargo do escritor Xavier Alcalá, ás sete. Ás dez e media recolleranse os cadros do certame de pintura benéfico. O diñeiro da venda das obras irá parar ao hospital Hijas de Galicia na Habana.
O domingo 14 é o día reservado para o Xantar Campestre no Círculo Habanero da Devesa, que comezará cunha sesión vermú, ás doce, e a partir das dúas servirase a comida, amenizda polo grupo cubano Timbabana.
O programa festivo péchase cunha nova actuación de Compay Segundo en San Roque.