Os amantes da vela están de parabén en Ribadeo, onde poderán gozar de ata nove regatas durante sete días, desde o vindeiro luns ata o día 16, domingo, no transcurso da trixésima edición da Semana Náutica, todo un clásico dos veráns mariñáns. Esta actividade deportiva, pero tamén social e lúdica, foi presentada onte pola xunta directiva elixida recentemente e presidida por Juan Calvo Sotelo. Tamén estivo o alcalde de Ribadeo, Fernando Suárez, e representantes das empresas colaboradoras que dan nome ás diferentes regatas.
O luns arrincarán as probas coa novena edición do trofeo dos comerciantes Acisa-Acia, de cruceiro local, programado para as cinco e media da tarde, a mesma hora para todas as regatas que se celebrarán pola tarde.
O martes será a quenda para a vixésima primeira edición do Trofeo Paradores, que se celebrará baixo o modelo de vela tradicional, mentres que o mércores regresarán os cruceiros locais para disputar a quinta edición do Trofeo Banco de Sabadell.
A Deputación de Lugo será a patrocinadora da regata do día 13, xoves, coa disputa da vixésima segunda edición do trofeo que leva o seu nome e o día 14, venres, disputarase o noveno trofeo Real Club Náutico de Ribadeo. O primeiro será de vela tradicional e o segundo, de cruceiro local.
A xornada do sábado 15 será unha das máis completas. Abrirase ás once da mañá coa celebración da sétima edición do Trofeo Seat-Talleres Armando Escolas de Verán, de vela lixeira, e pecharase coa trixésima edición dun dos trofeos máis veteranos, o Concello de Ribadeo, que cumpre a súa trixésima edición, tantos como a propia Semana Náutica. Este será de vela tradicional.
O domingo tamén haberá dobre sesión, co primeiro trofeo Ría de Ribadeo, que se estrea, en vela lixeira, e co noveno trofeo Abanca, de cruceiro local, pola tarde.
Os gañadores das regatas e as clasificacións xerais recibirán os trofeos correspondentes o día 22, a partir das oito da tarde. Tamén se entregará a segunda edición do Trofeo Xunta de Galicia ao que sexa elixido como o mellor patrón de vela tradicional e cruceiro local.
As inscricións poden realizarse na páxina www.clubnauticoribadeo. com ata dúas horas antes da regata.
