As últimas citas da fin de semana na vila ribadense —o Ribadeo Indiano e o primeiro desfile de charangas organizado pola patronal— puxeron en evidencia, unha vez máis por estas datas, a falta de aparcadoiros dos que adoece o centro urbano. Coa chegada de visitantes e a oferta hostaleira que ofrece o municipio, son numerosas as queixas de condutores que se pasan ata unha hora buscando onde aparcar á tardiña ou durante a noite, venres e sábados.
Foi o exalcalde socialista Balbino Pérez quen, xa como edil na oposición ao goberno do BNG, recordou a necesidade de recuperar o proxecto de creación dun aparcadoiro subterráneo debaixo do parque de San Francisco. A iniciativa rexeitouse fai máis dun lustro polos custos e porque o resto do ano, Ribadeo queda case deserta en comparación coa época estival, co que sobran as prazas.
Con todo, Castropol, sen ir máis lonxe, acaba de retomar o proxecto para crear dúas plantas de aparcadoiro en Pelamios, co obxectivo de eliminar prazas de aparcadoiro no porto de Figueras.
En Ribadeo, a remodelación, aínda en marcha do antigo Cine Colón, por parte da empresa Paisaxes de Asturias, podería darlle un alivio neste sentido á vila, xa que se contempla que o edificio albergue non só unha sala de usos múltiples e eventos, senón tamén prazas de aparcadoiro, en principio para os futuros hóspedes do hotel en que se poida converter a Torre do Moreno, pero tamén para os veciños e turistas.
Algúns veciños da Avenida de Galicia, preto de onde se atopa o aparcadoiro municipal con máis de 250 prazas, aseguraban que estes fins de semana non había sitio, nin neste aparcadoiro, nin no cedido ao Concello na Avenida Rosalía de Castro, e que estiveran dando voltas polo menos unha hora en busca de praza.
A poucos lles gusta a chaira de terra máis ben pensada para camións á entrada da vila, no Xardín, pero tamén esta acaba por encherse. Mentres e a pesar de que se buscaban todo tipo de ocos para deixar o coche, parece que se interpuxeron escasas multas por estacionamentos indebidos, polo que neste sentido, as autoridades locais móstranse comprensivas.
