A ribadense Rocío Botana é unha das integrantes da Asociación de sensibilidade química múltiple de Galicia que acaba de lograr un paso importante na súa loita por que se recoñeza o mal que afecta a estas persoas e que se manifesta nunha hipersensibilidad a sustancias microscópicas, tamén ondas como as dos móbiles ou os sons excesivos que lles xeran distinto tipo de problemas médicos, aínda que é un mal non recoñecido como enfermidade oficialmente.
Agora lograron un triunfo importante porque o Sergas acaba de publicar un Protocolo de Atención ás Persoas con Sensibilidade Química Múltiple, documento elaborado polo doutor Alfonso Alonso Fachado, subdirector de Ordenación Asistencial e Innovación Organizativa do Sergas.
Trátase dun documento dirixido a hospitais, centros de saúde e servizos de urxencias que contén as recomendacións que os servizos sanitarios galegos han de tomar para unha correcta atención sanitaria a estes enfermos. Rocío Botana destaca que está acordado con distintas entidades da sanidade pública galega.
A ribadense, afectada deste mal e que leva anos loitando para que se recoñeza como tal admite que "aínda que non cobre todas as necesidades do colectivo, este documento supón un avance crucial na atención sanitaria aos enfermos que hai en Galicia e desde a asociación manifestamos o noso agradecemento á dirección do Sergas e a nosa vontade de seguir colaborando no futuro para recibir unha atención sanitaria digna".
FORMACIÓN. Rocío Botana explica que na última reunión que mantiveron no colectivo do que forma parte co doutor Alonso Fachado "insistíuselle na necesidade de que a Consellería de Sanidade convocase cursos de formación para os profesionais sanitarios, sobre todo médicos, cousa á que el se comprometeu para o primeiro semestre do ano que vén".
Desde este colectivo manifestan o seu agradecemento á dirección do Servizo Galego de Saúde "e a nosa vontade de seguir colaborando no futuro para lograr que os enfermos de SQM de Galicia reciban a atención sanitaria, digna, equitativa e non discriminatoria que merecen".
