A praia de As Catedrais continúa cativando a propios e estraños, ademais de figurar entre as máis recomendadas do país polo seu encanto natural. A edición española da revista National Geographic sitúaa nunha nova reportaxe entre as 30 marabillas naturais de España, referíndose á obra que esculpiu a natureza como unha das formacións máis afamadas da Costa galega e con aforamento restrinxido para favorecer a súa conservación.
As rocas que dan formar aos seus arcos e bóvedas, de ata 32 metros de altura, semellan unha catedral no medio do mar, segundo esta revista, que indica ademais que está considerado como un dos 21 areais máis bonitos de España. Apunta que "cando baixa a marea é posible pasear entre as súas galerías naturais".
Esta proposta de viaxe de National Geographic fala das Catedrais como "un lugar único situado entre Ribadeo e Foz que nada ten que envexarlle á praia de Os 12 Apóstolos de Australia", indica comparándoa con esa outra obra do mar.
A praia ribadense aparece no número cinco das recomendacións que efectúa a revista, logo da selva de Irati (Navarra), Os mallos de Riglos, Agüero e Pena Rueba (Huesca), o parque nacional de Timanfaya (Lanzarote) e As Medulas do Bierzo (León). Séguenlle outros monumentos naturais tan destacados como O Torcal de Antequera (Málaga), os alicerces dos Órganos, na illa da Gomera, a fervenza do Pozo dos Fumes (Salamanca) ou Doñana (Huelva).
National Geographic invita deste xeito a coñecer algunhas das paisaxes naturais con maior atractivo do país cando está a piques de iniciarse a tempada turística.
